استفسار

[jetlee2020]

السلام عليكم ورحمة الله وبركاته


1- اثناء تمارين اللياقه وتمارين فتح الحوض بحس ان في تمزق جامد اووي عند مفصل الحوض من الداخل في الرجل اليمني
فهل هناك علاج لهذا الالم ام انه نتاج طبيعي للتمرين

2- بعد الانتهاء من التدريب بحس ان في الم جامد في ظهري عند الحوض من الخلف من عند فقرات القطنيه كدا لفوقها بحاجات بسيطه حتي وانا بصلي بحس بالالم دا فهل هناك حل لهذا ؟؟

[kung-fu master]

اولا عمرك كام سنه؟ ثانيا انت جاتلك اصابه فى المكان ده قبل كده؟

[jetlee2020]

اولا عمرك كام سنه؟ ثانيا انت جاتلك اصابه فى المكان ده قبل كده؟

اانا عمري 25 سنه ومحصليش اي اصابه قبل كدا في المكان دا لكن انا كل اللي حسيت بيه مزق صغير من فتره حوالي سنتين ومع كل تمارين فتح الحوض بعد كدا بحس بالالم دا

[kungfu]

السلام عليكم ورحمة الله وبركاته

نعتذر على التأخر فى الرد بسبب بعض المشاغل

هرد عليك وده طبعا مراجعة الكابتن kung-fu master وللأسف هو برده مردش علشان مشغول
هو واضح من كلامك إنك بتشد على نفسك فى تمارين الحوض وإحتمال كبير يكون حصلك مزق علشان كدهحاول تقف فتره عن التمرين وتدهن مراهم فى المنطقه دى لحد متخف وبالنسبه لألم الظهر حاول تقلل من أي مجهود يتعب الظهر وأي إستفسار أخر إحنا فى الخدمه

[jetlee2020]

جزاك الله كل خير بس حكايه اني اوقف التمرين دي صعبه اووي لان مش بتمرن غير يوم واحد في الاسبوع عشان ظروف شغلي كدا حتي مش بتمرن مع نفسي في البيت مفينفعش اني اوقف التمرين اكتر من كدا

والف شكر علي الاهتمام

[kung-fu master]

خلاص ممكن تتمرن بس ماتقرصشى على نفسك واعمل كمادات تلج وادهن مرهم زى ريباريل جل او هيمو كلار

[kung-fu master]

يارب تكون بقيت احسن دلوقتى

[hema elmasry]

السلام عليكم ورحمة الله وبركاته
الاخ جيتلى احب ابلغك اولا بالنسبه للمزق اللى عندك فالحوض اتبع الخطوات اللى هاقولك عليها مادام عاوز تكمل فالتمرينه بتاعتك :
1_ تخلى فترة الاحماء او التسخين بالنسبه للجسم قبل التمرين تكون مدتها طويله شويه وتعود نفسك على كده علطول لان ممكن المزق ده يكون جالك لعدم اتمامك الاحماء جيدا قبل التمرين وده بيسبب مزق مؤكد المهم لو هاتمرن حوض يبقى حاجه خفيفه موقته لحد ماتخف وتيجى بعد كل تمرينه تاخد شاوروتيجى عند منطقة الحوض بالزات وتقعد فميه دافيه وتدعك المنطقه اللى فيها المزق زى نظام تدليك المنطقه وبعد كده تجيب احد المراهم اللى زكرهم الاخ الزميل ( هيمو كلار _ ريباريل جيل ) وانشاء الله بالشفاء
2_ بالنسبه للظهر بقى فده مش عاوز مجهود جامد منك وتحاول تعمل ليها جلسات خفيفه حتى لو فالبيت تدليك فالمنطقه نفسها لو بعيده عن الفقرات العمود الفقرى واليكن فالقطنيه اما لو فالعمود نفسه مافدى مش عاوزه غير راحه تامه مع لفة حزام او رباط ضغط عريض حوالين وسطك فالمنطقه نفسها ودايما لما تنام حاول تنام على سجاده فالارض او على كنبه خشب وتنام وترفع رجليك على حاجه عاليه زى مخدتين فوق بعض علشان رفعة رجلك دى هاتخلى ظهرك بشكل مستقيم تحافظ بيها عالعمود الفقرى وانشاء الله مع الوقت هاتخف وتبقى زى الفل بازن الله وعايزك فالقريب العاجل تسمعنى خبر حلو بانك الحمدلله خفيت واى استفسارات تانيه انا تحت امركم
نصيحه يجب قبل كل تمرينه عمل احماء وتسخين الجسم بشكل كامل يعنى بالبلدى ومن الاخر تديله حقه علشان عدم التسخين او الاحماء الجيد بيؤدى اللى تمزق وشد عضلى وخلافه ودا غير انك مش هاتحس بطعم التمرين لانك هاتحس ان جسمك كله متكتف ومش عارف تعمل حاجه فالتمرين وشكرا واى استفسارات اخرى انا تحت امركم :):):):):)